Жогорку Кеңеш Кой-Таштагы абал боюнча токтом кабыл алды

Бүгүн, 8-августта Жогорку Кеңеште Кой-Ташта орун алган окуя боюнча кезексиз жыйынга чогулушту.

Өлкөдөгү туруктуулукту камсыздоо чаралары боюнча депутаттар бир катар сунуш-пикирлерин ортого салышты. Бул багытта өкмөткө бир катар тапшырмалар белгиленген Жогорку Кеӊештин токтом долбоору иштелип чыкты. Токтом долбоорунда өлкөдө дестабилизация кылууга жол бербөө, ага каршы бардык чараларды көрүү, УКМКнын Кой-Таштагы жүргүзгөн иш-чарасына карата Алмазбек Атамбаевдин жана анын тарапташтарынын иш-аракетине укуктук баа берүү жана башка маселелер белгиленген.

Депутат Мыктыбек Абдылдаев туруктуулукту камсыздоого кесиптештерин жигердүү катышууга чакырып, болуп өткөн окуя боюнча Башкы прокурор телеканалдар аркылуу элге кеӊири түшүндүрмө берүүсү керектигин сунуш кылды. Бир катар депутаттар талкууда айтылган сунуштар эске алынгандыгын белгилеп, токтом долбоорун колдоорун билдиришти.

Жыйынтыгында Жогорку Кеӊештин токтом долбоору добушка коюлуп, кабыл алынды. Токтом долбооруна 70 депутат "макул" деп добуш беришти. Ал эми "каршы" деп эч ким добуш берген жок.