Алмазбек Атамбаевдин жээнин УКМКга суракка алып кетишти

Бүгүн, 10-августта экс-президент Алмазбек Атамбаевдин жээни Нурбек Шаршеновду УКМКга суракка алып кетишти. Бул тууралуу КСДПнын өкүлү Кундуз Жолдубаева билдирди.

Анын айтымында, УКМКнын Чүй облусундагы кызматкерлери Кой-Ташка барышкан. Алар Нурбек Шаршеновду суракка алып кетишкен. Жолдубаева аларды кайсы иш боюнча жана эмнеге суракка алып кеткени азырынча белгисиз экенин айтты. Ал эми ИИМдин басма сөз кызматы КСДПнын өкүлдөрүнүн бири Кундуз Ажибекова дагы суракка чакыртылганын кабарлады.

8-августта Жолдубаева атайын кызматтын жоокерлерин барымтага алуу боюнча Ички иштер министрлигинде күбө катары сурак берген. 9-августта ал Ички иштер министрлигине экинчи жолу сурак берүүгө чакырылып, күбө катары тиешелүү суроолорго жооп бергенин айткан.

8-августта Кой-Таш айылында экс-президент Алмазбек Атамбаевдин үйүндө аны кармоо үчүн күч түзүмдөрүнүн экинчи операциясы орун алды. Буга чейин 7-августта болгон операция ийгиликсиз аяктап, андан 36 адам жаракат алып, 1 атайын даярдыктагы кызматтын аскери каза болгон.