Кундуз Жолдубаева тергөөчүлөрдү сотко берерин айтып чыкты

КСДПнын өкүлү Кундуз Жолдубаева укук коргоо органдарын сотко берерин айтып чыкты. Буга Ички иштер министрлигинин башкы тергөө башкармалыгынын кызматкерлери Жолдубаеванын телефонун тартып алганы себеп болгон.

"Мен байланышсыз калдым. 10-августтан 11-августка караган түнү ИИМдин башкы тергөө башкармалыгынын тергөөчүлөрү кара күч колдонуу менен телефонумду тартып алышты. Укук коргоо кызматкерлеринин бардык иш-аракети видеокамерага тартылып алынды. Видеолорду сотто көрсөтөбүз. Укук коргоочум Замир Жоошев соттук органдарга арыз менен кайрылууга даярданып жатат. Кененирээк сотто айтып беребиз", - деген ал.

Ал эми Замир Жоошев дагы 13 сааттан ашык убакыт тергөө башкармалыгында болгонун, бул мыйзам бузуу экенин жазып чыкты.

"Биз, Кундуз Жолдубаева экөөбүз эртең мененки саат 10:00дөн кечки саат 23:30га чейин (10-август) ИИМдин башкы тергөө башкармалыгында отурабыз. Тактап айтканда, 13 сааттан ашык убакыттан бери башкармалыктабыз. Бул Кылмыш-жаза мыйзамын бузуу болуп эсептелинет. Анткени тергөө амалдарын жүргүзүүнү эртеси күнкүгө калтыра тургандай жагдайлар жок болчу.

Кылмыш-жаза кодексинин 190-беренесине ылайык, күбө катышкан иликтөө иш-чаралары 8 сааттан ашык болбошу керек. Ошондой эле кийинкиге калтырууга мүмкүн болбогон учурда кылмыш ишин тергөө жана башка иш-чаралар кечинде жүргүзүлбөшү керек.

Кундуз Жолдубаева тергөөчүлөрдүн бардык суроолоруна жооп берди. Жогорудагы айтылган убакыт аралыгында күбөлөргө тамактанууга убакыт бөлүнүп берилген жок", - деген жактоочу.