КҮНСОБОЛ: Алмазбек Атамбаевди кармоо боюнча күч органдарынын ишинде кайсы аракеттер туура, кайсынысы туура эмес болду? Экс-депутат Каныбек Осмоналиев: "Атамбаевди сүйлөшүү жолу менен колго түшүргөнү туура болду"

Бүгүн ички иштер министри, УКМКнын төрагасы жана башкы прокурор маалымат жыйынын берди. Жыйында күч түзүмдөрүнүн жетекчилери Алмазбек Атамбаев эки жолку сүйлөшүүдөн кийин колго түшкөнүн жана Кой-Ташта орун алган окуя тууралуу айтып беришти.

SUPER.KG порталы "Алмазбек Атамбаевди кармоо боюнча күч органдарынын ишинде кайсы аракеттер туура, кайсынысы туура эмес болду?" деген собол салды.

Жогорку Кеңештин экс-депутаты Каныбек Осмоналиев 7-августта Атамбаевди кармоо боюнча аракеттер туура эмес болгонун айтты.

"7-августта УКМКнын "Альфа" атайын даярдыктагы башкармалыгынын атышканы, Атамбаевди кармоо тактикасы туура эмес болду. Ал эми 8-августта генерал Курсан Асанов баш болуп сүйлөшүү жолу менен Атамбаевди багынтып, колго түшүрүп алып кеткени туура болду", - дейт Каныбек Осмоналиев.