Президент "Бишкек" эркин экономикалык аймагына барып, экспортко багыт алган бир катар ата мекендик ишканалардын иши менен таанышты

"Ата Мекендик товарларды чет өлкөлөрдүн рынокторуна чыгаруу - мамлекеттик органдар менен бизнестин биргелешкен милдети" деп бүгүн, 15-августта президент Сооронбай Жээнбеков "Бишкек" эркин экономикалык аймагына барып, экспортко багыт алган бир катар ата мекендик ишканалардын иши менен таанышканда билдирди.

Маалыматка ылайык, мамлекет башчы өндүрүштүк процессти, чыгарылган продукцияларды көрүп, алардын жетекчилигинин көйгөйлөрүн укту.

"Салкын" ЖЧКсынын байпак өндүрүү боюнча ишканасынын жетекчиси бул ишканага 20 миллион сомдон ашык инвестиция тартылганын айтты. Чыгарылган продукциялардын көп бөлүгү Казакстандын жана Орусиянын базарларына жөнөтүлөт. 200 адам жумуш менен камсыз болгон.

Сооронбай Жээнбеков ошондой эле желим, боёкторду, курулуш материалдарын жана жалаяк шымдарды чыгарган "Пейванд" ЖЧКсынын иши менен да таанышты. Мында 18 адам иштейт, продукциялар алыскы жана жакынкы чет өлкөлөргө Орусияга, Казакстанга, Өзбекстанга, Тажикстанга жөнөтүлөт.

Андан соң президент айыл тургундарын таза суу менен камсыз кылууда пайдаланылуучу буюмдарды, материалдарды жана түтүктөрдү өндүрүүчү "Корона" ЖЧКсынын ишканасына барды. Ишканада 15 адам эмгектенет. 2019-жылдын биринчи жарымында чыгарылган продукциялардын жалпы наркы 1 миллион сомдон ашкан.

Мамлекет башчысы бул ишкананын социалдык багыттагы ишкана экенин канааттануу менен белгилеп, өндүрүлгөн продукциянын сапаты өлкөнүн региондорун таза суу менен камсыз кылуунун сапатына тикелей таасир эте турганына көңүл бурду.

Президент Сооронбай Жээнбеков ишкерлер менен маектешүүнүн жүрүшүндө инвестицияларды, заманбап технологияларды тартуунун жана жумуш орундарын түзүүнүн маанилүү экенин дагы бир жолу белгиледи.

Ишкерлер тарабынан айтылган бардык көйгөйлүү маселелер боюнча мамлекеттик органдарга тийиштүү сунуштар бериле турганы айтылды.