Жактоочулар ооруканага жеткирилген Сапар Исаковдун абалы тууралуу айтып беришти

Бүгүн, 16-августта ооруканага жеткирилген Сапар Исаковдун абалы тууралуу жактоочулар Нурбек Токтакунов жана Замир Жоошев айтып беришти. Алар Исаков ооруканага которулгандан кийин кирип, абалы менен таанышып чыккандарын айтат.

Сапар Исаковдун ден соолугу начарлаганын массалык маалымат каражаттарынан уктук деген Замир Жоошев буларга токтолду.

"Эртең менен Исаков кризистик абалда болуптур. Тагыраагы, ал инсультка кабылуу абалында болгон экен. Ошондо гана "Тез жардам" унаасы менен алып чыгышып, медициналык жардам көрсөтүлүптүр. Азыркы учурда оорукананын неврология бөлүмүндө жатат. Белгилеп кетчү жагдай, тергөө изоляторунун администрациясы тарабынан мыйзамды одоно бузуу болгон. Прокуратура тарабынан бул ишке баа берилиши керек. Азыр анын жанына жакындарын, келинчегин дагы киргизбей жатышат. Мен жана дагы бир жактоочу экөөбүз эле кирип чыктык", - деди ал.

Ал эми Нурбек Токтакунов Исаковдун абалы канааттандырарлык экенин айтты.

"Сапар Исаковдун абалы чындап эле начарлап кеткендигине байланыштуу аны Улуттук госпиталга алып келишиптир. Азыр медициналык расмий аныктама жок. Ал эми Исаков сүйлөп жатат, абалы канааттандырарлык", - деген Токтакунов.

Саламаттыкты сактоо министрлиги Сапар Исаков Улуттук госпиталга бүгүн саат 16:50 чамасында кыр арка омурткасындагы тамырларда кан айлануунун бузулушу деген диагноз менен келип түшкөн. Учурда бейтаптын абалы канааттандырарлык. Дарыгерлердин айтымында, томографиялык сүрөттө инсульттун белгилери жок.