Атамбаевдин уулу менен Текебаевдин кызынын кайым айтышуусу кечирим суроо менен аяктады

Мурдагы президент Алмазбек Атамбаевдин уулу Кадыр Атамбаев Өмүрбек Текебаевдин кызы Ай-Данэк Текебаевадан кечирим сурады. Кечирим суроого Кадыр Атамбаевдин Текебаевдин дарегине карата "акылынан ажыраган келесоо" деген сөзү себеп болду. 16-августта Алмазбек Атамбаевдин баш коргоо чарасы каралып, ага мурдагы президенттин жубайы, балдары дагы келген. Анда Кадыр Атамбаев Өмүрбек Текебаевдин иши боюнча комментарий берген.

"Текебаев Атамбаевге каршы күрөшүүдө өзүн актоо үчүн жомок ойлоп табышы керек болгон. Ошентип аларга Дача-СУ боюнча жомок табылды. Анда документтер түрк тилинде каталары менен жазылган. Анда ишенүүгө мүмкүн болбогон атайын ойлоп табылган абал, болбогон кеп экени жазылган. Мен үчүн бул акылга сыйбас окуя. Текебаев алгач бизди электр техникаларын ташып келет деди. Кийинчерээк чайнекке алтын салып ташышат дей баштаган. Бул акылынан ажыраган келесоо. Түркиянын элчилиги бул маалыматты четке каккандан кийин ушундай нерсени кантип ойлоп табат? Кийинчерээк жүк япониялык тамеки компаниясына таандык экени маалым болду", - деген ал.

Өмүрбек Текебаевдин кызы Ай-Данэк Текебаева Кадыр Атамбаевдин билдирүүсүнө реакция кылды.

"Бул жакшы эмес. Анын деңгээлине түшпөйм. Чын элеби? Мен бул куру сөзгө комментарий бергим келбейт! Бул видеонун алгачкы секундаларында эле жагымсыз болгондуктан аягына чейин көргүм келген жок. Бир эле нерсе айткым келет, ал атасын коргоп айтылгандарга (Дача-СУ окуясы боюнча) макул эмес болсо дагы (мен аны түшүнүп турам) кызуу кандуулукка алдырбай, адамдын жеке дарегине өтүп, мазактабашы керек", - деген жообун калтырган.

Кийинчерээк Кадыр Атамбаев бул сөздү ал башкача ой менен айтканын, журналисттер сүйлөмдү кыскарткандыктан сөздүн мааниси бурмаланып калганын жазып чыкты.

"Бүгүн "акылынан ажыраган келесоо" деген фраза менен аша чаап кеттим. Бирок ал сөздү башкача мааниде колдонгом. Массалык маалымат каражаттары "кичипейилдик менен" кыскартып коюуну чечишкен. Албетте, бул сөз мени актай албайт. Өмүрбек Текебаевдин кызынан тарта баарыңыздардан кечирим сурайм. Мени баары менен кайраштыргысы келген адамдарды аңдап-туюп турам", - деп фейсбуктагы баракчасына жазган.