Бүгүн Чүй облустук сотто Садыр Жапаровдун иши каралат

Бүгүн, 19-августта Чүй облустук сотто Садыр Жапаровдун иши каралат. Бул тууралуу SUPER.KG порталына Жогорку Соттун басма сөз кызматынан билдирди.

Маалыматка ылайык, Чүй облустук соту Садыр Жапаровдун апелляциялык арызын кабыл алган. Соттук отурум саат 11:00гө белгиленген.

Окуянын чоо-жайы:

Садыр Жапаров 2013-жылдын 7-октябрында Каракол шаарында "Кумтөр" боюнча нааразычылык акциясындагы башаламандыкты уюштурууга күнөөлөнүп, 2017-жылдын 25-мартында Кыргыз-Казак чек арасынан өлкөгө кирип келе жаткан жеринен кармалып камакка алынган. 2017-жылдын 2-августунда Жапаров Биринчи Май райондук сотунун өкүмү менен "барымтага алуу" беренеси боюнча күнөөлүү деп табылып, 11 жыл 6 айга эркинен ажыратылган. Райондук соттун өкүмүн Бишкек шаардык соту жана Жогорку Сот күчүндө калтырган. Быйыл 30-апрелде Жогорку Сотто абактагы саясатчы Садыр Жапаровдун иши кайрадан каралып, соттук коллегия анын жаза мөөнөтүн бир жарым жылга кыскарткан.