Депутат Ирина Карамушкина Атамбаевди кармоо учурунда дагы бир жаран каза болгонун жазып чыкты. Саламаттыкты сактоо министрлиги бул маалыматты четке какты

Депутат Ирина Карамушкина өзүнүн Фейсбук баракчасына экс-президент Алмазбек Атамбаевди кармоо операциясында алган жаракатынан улам 24 жаштагы бала каза болгонун жазып чыкты.

Билдирүүдө каза болгон жаран 24 жаштагы Миржан Курманбек уулу экени жазылган. Ошондой эле бул маалыматты партиялаштары тактап жатканы жазылган.

Бул билдирүү боюнча Саламаттыкты сактоо министрлиги маалыматты четке кагып, буларды кабарлады.

"7-8-августтагы окуяда 139 адам жаракат алып, ар кандай медициналык жардам көрсөтүлгөн. Азыркы убакта Бишкектеги травматология жана ортопедия илим-изилдөө борборунда 4 адам, Улуттук госпиталда 6 адам дарыланууда. Ошондой эле 14-15-август күндөрү дарыгерлер Арашан жана Кой-Таш айылдарындагы ар бир үйгө кирип, текшерүү да кылышкан. Саламаттыкты сактоо министрлиги дагы бир жолу окуяда Үсөнбек Ниязбеков каза болгонун тастыктайт. Ал эми Миржан Курманбек уулу аттуу жаран жаракат алгандардын да, медициналык жардам көрсөтүлгөндөрдүн да тизмесинде болгон эмес", - деп жазылат маалыматта.

Ал эми УКМКнын басма сөз кызматынан "Миржан Курманбек уулу атайын күч кызматкери тарабынан уруп согуудан каза болду" деген маалымат чындыкка дал келбестигин билдирди.

"Ирина Карамушкинанын бул билдирүүсүн далилсиз маалыматтарды жайылтуу аркылуу коомчулукту алдоо катары эсептесек болот. Ошондуктан УКМК жалган маалыматтарды жайылтууда мыйзамга ылайык жоопкерчиликке тартыларын эскертет", - деп жазылат маалыматта.