Ошто мурда эки жолу соттолгон "ХБКлык Бема" облустук соттун чечими менен үй камагына чыкты

"Уурулук" беренеси менен эки жолу соттолгон Т.Б. ("ХБКлык Бема" деген ат менен таанымал) Ош облустук сотунун чечимине ылайык, 2 жылдык сынак мөөнөтү менен үй камагына чыкты. Ал сот залынан бошотулган. Бул тууралуу облустук соттун басма сөз кызматынан билдирди.

Маалыматка ылайык, чечим 10-июлда чыккан. Буга чейин Ош шаардык соту аны күнөөлүү деп таап, 5 жылга эркинен ажыраткан.

Окуянын чоо-жайы:

2018-жылдын 23-декабрь күнү саат 17:30 чамасында Ош шаарынын А.Масалиев көчөсүндө жайгашкан үйлөрдүн биринде жашаган 21 жаштагы келиндин үйүнө 2 бала жана 3 кыз кирип, ага бычак такап коркутушкан. Алар жабырлануучунун үйүнөн 1 жарым миң доллар акчасын, Iphone 6 үлгүсүндөгү уюлдук телефонун, 13 миң сомун, 3 жарым миң сомдук күрмөсүн жана башка буюмдарын алып кетишкен. Бул факты боюнча Ош ШИИБи "каракчылык" беренеси менен иш козгоп, шектүүлөр кармалышкан.

Ал эми 5 жылга эркинен ажыратылган Т.Б. аттуу кыздын буга чейин дагы Ош шаарында 11-класста окуган кызды канжалата сабаган видеосу социалдык тармактарга тарап кеткен. Бул факты боюнча Ош ШИИБи "бейбаштык" беренеси менен иш козгогон.