Өкмөт жерлерди трансформациялоону жергиликтүү мамлекеттик администрацияларга өткөрүп берүүнү демилгеледи

Премьер-министр Мухаммедкалый Абылгазиев жерлерди трансформациялоо боюнча компетенцияларды ыйгарым укуктуу мамлекеттик органдарга өткөрүп берүү маселеси боюнча жумушчу кеңешме өткөрдү. Бул тууралуу өкмөттүн басма сөз кызматынан билдирди.

Өкмөт башчы белгилегендей, бул ыйгарым укуктарды өткөрүп берүүнүн зарылдыгы бүгүнкү күнү жергиликтүү бийлик органдарынын алдында ыкчам чечүүнү талап кылган маанилүү милдеттер тургандыгы менен шартталат.

"Өкмөттүн компетенциясына кирген баалуулугу кыйла төмөн айыл чарба жерин кыйла баалуусуна которуу, баалуулугу теңдеш айыл чарба жерин бир түрдөн башкасына которууну ыйгарым укуктуу мамлекеттик органдарга өткөрүп берүү керек. Бул биздин жарандардын кызыкчылыгында кыйла натыйжалуу иштерди жүргүзүүгө шарт түзөт. Жогорку Кеңеш өкмөттүн демилгесин колдоп берет деп ишенем", - деди Мухаммедкалый Абылгазиев.

Аталган маселе боюнча өкмөт башчы Юстиция министрлигине бул мыйзам долбоору менен белгилеген тартипте иш алып барууну улантууну тапшырды.