"Дастан Садыр уулу катуу ылдамдыкта айдаган эмес" дешет жакындары. Кырсыктан видео

Бүгүн, 26-августта экс-депутат, абактагы саясатчы Садыр Жапаровдун тун уулу жол кырсыгынан көз жумду. Бишкек шаардык жол кыймылынын коопсуздугун көзөмөлдөө башкы башкармалыгы кырсыктын себеби тууралуу билдирүү таратып, "күбөлөрдүн айтымында, маркум Дастан Садыр уулу катуу ылдамдыкта келе жатып токтоп турган унаага урунган" деп белгилеген.

Көп өтпөй каза болгон жигиттин жакындары ал маалыматты четке кагып, SUPER.KG порталына окуя тартылып калган видеону берди. Жакындары белгилегендей, Дастан Садыр уулу токтоп турган унаага урунган эмес.

"Чүй ОИББи катуу бара жатып токтоп турган унааны сүзүп алган деп калп маалымат таратып жатат. Мына бул видеобайкоодо даана көрүнүп турат. С.Э. аттуу айдоочу унаа токтотуучу жайдан артка жылып, артындагы автоунааны өткөрүп, анын артында удаа эле келе жаткан мотоциклге капталын тосуп берип жатат. Ал жерден бурулууга мүмкүн эмес. Анткени ал жерде эки катар линия турат. Анысы аз келгенсип С.Э. автоунаасы менен Дастанды тебелеп өтүп, жолдун аркы өйүзүндө турган автоунааны сүзүп токтогон. Өзүңүздөр көрүп тургандай, Дастан эч кандай катуу келе жаткан эмес. Ушундан улам "Медет Садыркуловдукундай окуя кайталанып жаткан жокпу?" деген ой келди. С.Э. "эч нерсе жоктой көрүнгөн, бурулуп кеткенге үлгүрүп калам го деп ойлогом" деп жатат", - деп жазылат маркумдун жакындары берген кайрылууда.

Дастан Садыр уулунун өмүр баяны тууралуу кенен маалымат бул шилтемеде.