Жакынкы арада автобустарда электрондук төлөм системи ишке киргизилет

Ушул жылдын сентябрь айынан тарта автобустарда жол кире төлөмүн электрондук түргө өткөрүү пландаштырылууда. Бишкек мэриясынын маалыматына ылайык, долбоор аймактарды өнүктүрүү жана санариптештирүүнүн алкагында ишке ашырылууда.

"Бишкектин жүргүнчүлөр автотранспорту" ишканасында жалпысынан 400 коомдук унаа бар. Мэриядан билдиргендей бул системдин жакшы жактары көп. Айдоочу жол кире акысын алып, кайра акча кайрып берип алаксыбайт.

Жакынкы арада автобустарга терминал орнотула баштайт. Төлөм жүргүзүү үчүн жүргүнчүлөр атайын чип, электрондук карта же колго таккан билерик сатып алышат.

Ушул жылдын 25-февралында Ош шаарында коомдук транспорттордо электрондук билеттерди кабыл алуучу автоматташтырылган систем ишке кирген. Ал эми 28-февралда Ош шаарындагы троллейбустар толугу менен автоматтык тейлөөгө өткөн.