Сапар Исаков бүгүн эртең менен ооруканадан УКМКнын СИЗОсуна которулду

Мурдагы өкмөт башчы Сапар Исаковду бүгүн, 28-августта эртең менен Улуттук госпиталдан УКМКнын СИЗОсуна алып кетишти. Маалыматты жактоочу Нурбек Токтакунов кабарлады.

Жактоочунун айтымында, ал эртең менен барып Исаковду палатадан таппай калган.

"Сапар Исаковдун абалы оор болчу. Бирок укук коргоо органдары сот процессин ылдамдатыш үчүн чыгарып кетиптир. Дарыгерлер Исаковдун абалы начар экенин айтып жатышкан. Бирок аларга кызматкерлер басым жасап эле чыгарып кетишкен окшойт. Атайын кызматтын таасири оорукчан адамды дени сак, дени сак адамды оорукчан кылып коё алат", - деди Токтакунов.

Сапар Исаков 16-августта кыр арка омурткасындагы тамырларда кан айлануунун бузулушу деген диагноз менен абактан ооруканага жеткирилген. Ал өткөн жылдын июнь айында УКМКнын СИЗОсуна камакка алынганы маалым.