Өмүрбек Текебаев: "Текебаев аялдарды тандоодо жаңылган эмес"

Экс-депутат Өмүрбек Текебаев өзүнүн тарапташтары менен "Ата-Мекен" партиясынын штабында жолугушуу өткөрүүдө. Анда Утурумдук өкмөттүн төрайымы Роза Отунбаева Текебаев менен Чотоновдун үй камагына чыгышы үчүн жактоочулары Таалайкүл Токтакунова менен Чынара Жакупбековага ыраазычылык билдирди. Бул учурда сөз алган Текебаев аялдар жөнүндө буларды айтты.

"Айгүл (ред.Текебаева) мага жолугушууга барганда мындай деп айтып калды "Бир күнү Роза Исаковна, дагы бир топ аялдар болуп Болот Шердин үйүнө бардык. Анан Болот мени "Текебаев адамдарды тандаганды билбейт, менин айткандарымды укпайт" деп сындай баштады дейт. Анан бир топко пауза кылып туруп "бирок аялдарды тандагандан жаңылган эмес" деп коёт" дейт.

Анткени Роза Исаковна, Аида Салянова, Наталья Никитенко, Асия Сасыкбаева сыяктуу бир топ аялдар барган экен. Мен аялдарга өзгөчө ыраазычылык билдиргим келет. Эркектер, капа болбогула. Аялдар абдан туруктуу жана кайраттуу келишет экен", - деди ал.

Бүгүн, 29-августта Биринчи Май райондук сотунда Өмүрбек Текебаев менен Дүйшөнкул Чотоновдун баш коргоо чарасы каралып, анда экөө үй камагына чыкты.