Жол коопсуздугун көзөмөлдөө кызматы Ош шаарынын вице-мэрин мас абалында унаа айдаган деп айыптоодо. Мэриянын жообу

Ош шаарында мас абалда унаа башкарып бара жаткан делген вице-мэр Жасур Азимовдун машинасы айып короосуна токтотулду. Бул тууралуу шаардык жол кыймылынын коопсуздугун камсыздоо бөлүмү билдирди.

Маалыматка ылайык, окуя 24-август күнү болгон. Анда вице-мэрдин унаасы борбордук аянтка тыюу салынган жол менен киргени үчүн токтотулган.

"Ошондой эле бул окуя видеого тартылып интернетке тараган. Видеодон вице-мэрдин спирт ичимдигин ичкенин, Ташкент шаарынан келген коноктору менен жүргөнүн айтып жатканын көрүүгө болот", - деп айтылат маалыматта.

Бул факты боюнча кызматтык иликтөө жүрүп жатканын мэриянын басма сөз кызматынан билдирди.

"Бул окуя дем алыш күнү болгон. Ошондой эле вице-мэр мас абалында экенин айтып, кызматкерлерге эч кандай каршылык көрсөткөн эмес. Ал мыйзамга баш ийип, наркологияга да барган. Унаасын милиция кызматкерлерине өткөрүп берген. Анын унаасын ошол убакта башка адам башкарып бара жаткан, бирок машина өзүнө таандык. Дагы кошумчалай кетчү жагдай, бул окуяны видеого тартып, интернетке тараткан кызматкерлерге дагы ИИМ ички иликтөө иштерин жүргүзүүдө. Кийин дагы маалыматтар берилет", - деди басма сөз кызматынан.