Мурдагы мэр Албек Ибраимов сотто көрсөтмө берүүдөн баш тартты

Бүгүн, 30-августта Бишкек шаарынын Ленин райондук сотунда Бишкектин мурдагы мэрлери Албек Ибраимов менен Кубанычбек Кулматовго козголгон кылмыш иши боюнча соттук отурум уланды. Отурумда Албек Ибраимов көрсөтмө берүүдөн баш тартты. Бул тууралуу Ленин райондук сотунун басма сөз кызматынан билдирди.

Мындан улам соттук отурум 2-сентябрга жылдырылды.

Окуянын чоо-жайы:

Кубанычбек Кулматовго карата 2018-жылдын май айында "коррупция" беренеси боюнча кылмыш иши козголуп, июнь айында камакка алынган. Ал Бишкек шаарынын мэри болуп турган кезде Калыс-Ордо конушундагы мектеп жана бала бакчага бөлүнгөн акчаны мыйзамсыз колдонгон деп айыпталууда.

Албек Ибраимовго карата 2018-жылдын май айында “ишенип берилген мүлктү ыйгарып алуу же жок кылуу” беренеси боюнча кылмыш иши козголуп, бул иш экс-мэрдин “Дастан” ишканасын жетектеп турган мезгилге байланыштуу экендиги айтылган. Июль айында ал ушул эле кылмыш ишинин негизинде камакка алынган.

Кийинчерээк Ибраимовго карата “коррупция” беренеси боюнча жаңы айып угузулган. Анда ал Бишкек шаарынын түштүк аймагында жайгашкан муниципалдык жер тилкелерин мыйзамсыз сатууга айыпталууда. Ушул жылдын 6-мартынан тартып Кулматов менен Ибраимовдун иштери бириктирилип, сотто карала баштады. Эки экс-мэрдин ишине байланыштуу жалпысынан 14 адамга айып коюлган.