Көк бөрү: Оштун "Достук" командасы президенттин Кубогун жеңип алды

Бүгүн, 31-августта Чолпон-Ата шаарында өтүп жаткан көк бөрү боюнча Кыргыз өлкөсүнүн президентинин Кубогуна арналган мелдеште Жогорку Лиганын финалында "Ынтымак" менен "Достук" командалары күч сынашты.

Бүйүр кызыткан, көрүүчүлөрдү ордунан тургузуп, бирде сүйүнтүп, бирде демин ичине катырган оюнда Оштун "Достук" командасы жеңишке жетишти.

Нааразычылык менен коштолгон оюнда Манас Ниязов тай казанга 2 улак таштаса, оюндун бүтүшүнө 1 мүнөт калганда Майрамбек Рысбеков "Ынтымактын" тай казанына улак ыргытып оюндун жүрүшүн чечти.

"Ынтымак" командасы калыстар тобунун чечими менен макул эместигин айтып, өз нааразычылыктарын билдиришти.

Айта кетсек, уткан команда 1 миллион сом акчалай сыйлыкка жана Кубокко ээ болот, ал эми 2-орунду алган "Ынтымак" командасы 500 миң сом акчалай сыйлык алат.