Ырчы Мирбек Атабековдун апасынын үйүн тоноого шектелип 24 жаштагы жаран кармалды

Каракол шаарында Бишкек шаарынын Октябрь райондук милициясы тарабынан Мирбек Атабековдун апасынын үйүн тоноого шектелип жаран кармалды. Бул тууралуу Бишкек ШИИББинин басма сөз кызматынан билдиришти.

Буга чейин белгилүү болгондой, Бишкек шаарында 6-майга караган түнү ырчынын апасынын үйүнө белгисиз адамдар бет капчан кирип, жалпы суммасы 60 миң долларды түзгөн акча каражатын жана зер буюмдарды алып кеткен.

"Бул факты боюнча "каракчылык" беренеси боюнча кылмыш иши козголду. Кылмыштан кийин шектүү Ысык-Көл облусуна из жашырып кеткен. Шектүү 24 жаштагы Б.М. аттуу жаран Караколдун кафелеринин биринде кармалган. Анын унаасын тинтүү учурунда далил буюмдар табылган. Азыркы учурда бул кылмышка тиешеси бар адамдарды издөө жүрүп жатат", - деп билдирди.

Кылмышка шектүү Б.М. убактылуу кармоочу жайга киргизилген.

Окуянын чоо-жайы:

Милицияга арыз менен Д.А. аттуу жаран кайрылган. Анда ал белгисиз адамдар үйүнө кирип, күч колдонуу менен тоноп кетишкенин билдирген. Бул факты Кылмыштардын жана жоруктардын бирдиктүү реестрине катталып, ыкчам изилдөө тобу түзүлгөн.