Мирбек Атабеков милиция кызматкерлерине, журналисттерге жана күйөрмандарына ыраазычылык билдирет

Кыргыз Республикасынын Эмгек сиңирген артисти Мирбек Атабеков апасынын үйүн тоногон жаранды кармагандарга ыраазычылыгын билдирди. Бул тууралуу ал видео даярдап, социалдык тармактагы баракчасына жарыялады.

Анда ал үй-бүлөсүнө, апасына, карындашына тиешелүү кайгылуу окуя болгонун, ал баарына белгилүү экенин айтат. Ошол окуяга тиешеси бар адамдардын тобунун башчысы кармалганын белгилеп, милиция кызматкерлерине ыраазычылыгын айткан.

"Бишкек ШИИББине, Октябрь райондук ички иштер бөлүмүнүн тергөөчүлөрүнө, жалпы жамаатына терең ыраазычылыгымды билдирем. Азыр тергөө процесси жүрүп жатат, ошондуктан мамлекеттик органдарга, сот системине, прокуратурага кайрылып кетейин. Бул ишти аягына чейин адилеттүү карап берүүңүздөрдү суранам. Урматтуу кыргыз элим, сиздердин колдооңуздарга рахмат. Өзгөчө журналисттерге, менин жакындарыма, күйөрмандарыма рахмат", - дейт видеодо.

Ал эми ырчы видеокайрылуу жасаганын себебин мындайча түшүндүрдү. "Шектүүлөр жактоочуларга, сотторго акча берип чыгып кетишин каалабайм".

Окуянын чоо-жайы:

Бишкек шаарында 6-майга караган түнү ырчынын апасынын үйүнө белгисиз адамдар бет капчан кирип, жалпы суммасы 60 миң долларды түзгөн акча каражатын жана зер буюмдарды алып кеткен. Кечээ, 2-сентябрда шектүү катары 24 жаштагы Б.М. Караколдун кафелеринин биринде кармалып, убактылуу кармоочу жайга киргизилген.