Бүгүн Алмазбек Атамбаевдин жактоочуларынын даттануусу боюнча эки соттук отурум болот

Бүгүн, 4-сентябрда мурдагы президент Алмазбек Атамбаевдин жактоочуларынын даттануусу боюнча эки соттук отурум болот. Жактоочу Замир Жоошов соттук отурумдар кайсы жерде өтөрү белгисиз экенин айтып буларга токтолду.

"Биринчи отурум 7-8-августта Алмазбек Атамбаевди кармоо операциясындагы тергөөчүнүн мыйзамсыз иш-аракети боюнча өтөт. Бул иш Бишкек шаардык сотунда саат 11:00гө белгиленген. Азырынча кайсы жерде болору белгисиз болуп жатат. Анткени соттук отурумга Атамбаевдин келиши шарт. Мындан улам аны алып чыкпоо үчүн УКМКдан эле өткөрүп коюшу мүмкүн.

Ал эми экинчи соттук отурум Биринчи Май райондук сотунун Атамбаевди 26-октябрга чейин абакта калтыруу чечими боюнча болот. Ал саат 11:30га белгиленген", - деди жактоочу.

8-августта Кой-Таш айылында экс-президент Алмазбек Атамбаевдин үйүндө аны кармоо үчүн күч түзүмдөрүнүн экинчи операциясы орун алып, ал УКМКга камакка алынган.