Жалдагы үрөй учурган окуя боюнча өкмөт башчы: "Укук коргоо органдарында мындай кызматкерлерге орун жок"

Премьер-министр Мухаммедкалый Абылгазиев ички иштер министри Кашкар Жунушалиевге эки жарандын ур-токмокко алынганы боюнча акыркы чараларды көрүүнү тапшырды. Бул тууралуу өкмөттүн басма сөз кызматынан билдирди.

Мындан тышкары, өкмөт башчы Саламаттыкты сактоо министрлигине жабыркагандарга квалификациялуу медициналык жардам көрсөтүүнү, зарыл дары-дармектер менен камсыздоо тапшырмасын берди.

"Ырайымсыздыгы менен таң калтырган 28-августта болуп өткөн эки жигитти ур-токмокко алуу окуясы тыкыр иликтенип, күнөөлүү адамдар жоопко тартылууга тийиш. Окуя болгон жерге келип кайдыгерлик жана кесипкөйсүздүк көрсөткөн милиция кызматкерлерине карата тийиштүү чаралар көрүлүшү керек. Укук коргоо органдарында мындай кызматкерлерге орун жок", - деди Мухаммедкалый Абылгазиев.

Премьер-министр бул окуяга байланыштуу күнөөлүүлөрдү кармоо боюнча ыкчам иш-аракеттерди жүргүзүүнү жана бардык мыйзам талаптары боюнча жоопко тартуу керектигин белгиледи.