Нарындагы контейнер мектептин ордуна кайдыгер эмес жарандар ашар жолу менен жаңысын салууга каражат топтошууда

Интернет тармагында контейнер мектептин ачылыш аземинен тартылып алынган сүрөт учурда дагы деле талкууга алынууда. Мындан улам социалдык тармактын колдонуучулары Нарын районуна караштуу Кеңеш айылындагы Казаалы Абиров атындагы орто мектебин ашар жолу менен салууну демилгелешүүдө.

Анда колдонуучулардын бири 50 миң кирпич, бири мектептин пайдубалын тургузуп берерин, дагы бири чатырын жаап бере турганын жазышууда. Бул пикирди көп мекендештер колдоп, кээ бири мектеп салып берүүнү өкмөттөн талап кылышы керек деген пикирлерин дагы калтырышты.

Учурда Орусия, АКШ жана башка өлкөлөрдөн мекендештер мектептин курулушуна акча каражаттарын которушууда.

Нарын облусунун Нарын районуна караштуу Кеңеш айылындагы Казаалы Абиров атындагы орто мектебин Өзгөчө кырдаалдар министрлиги кыйроо абалында турат деп тизмеге киргизген. Мындан улам окуучулардын ал мектепте окуусуна тыюу салган. Учурда аталган айылдагы окуучулар жаңы окуу жылын контейнерде окуу менен баштады.