Үрөй учурган мушташта жабыркагандардын жакындары "шектүүлөрдү кармоо ИИМдин колунан келбесе министр кызматтан кетсин" деген талапты коюшту

Бүгүн, 5-сентябрда Ак Үйдүн астында Бишкектин Жал кичи районунда орун алган мушташка байланыштуу митинг болуп өттү. Митингге келгендер үрөй учурган мушташта эки жаранды катуу сабаганга шектүүлөрдүн эртерээк кармалып, жазаларын алуусун талап кылышты.

Митингчилер ички иштер министри мушташка шектүү эки жаранды 3 күндөн бери кармай албаса, министр кызматтан кетсин деген талаптар да айтылды.

Катуу абалда сабалгандардын бири Асылбек Молдажиевдин атасы Дүйшөнбек Молдажиев баласынын абалы азыр деле оор экенин айтып, шектүүлөрдү эртерээк кармоо өтүнүчү менен эл өкүлдөрүнө кайрылды.

"Кайсыл бир чоң чиновниктин баласы болсо бир секиртпей эле бир күндө кармашмак. Урматтуу депутаттар, сиздердин суранарым өзүңөр көзөмөлгө алып, эртерээк кармап бергиле. Шектүүлөрдүн байкесин кызматтан алышты. Ал болсо кызматтан алынганына кайгырып атыптыр", - деди жабырлануучулардын биринин атасы.

28-август күнү Бишкектин Жал кичи районунда үрөй учурган мушташ орун алып, анын кесепетинен эки жаран оор абалда комага түшкөн.