Үрөй учурган мушташта жабыркаган адамдын эжеси: "Эмнеге милиция маңдайында турган кылмышкердин колуна кишен салбайт?"

Бишкектин Жал кичи районундагы үрөй учурган мушташта жабыркагандардын эжеси Э.Б. кылмышка шектүүлөр Бишкек ШИИББине келгени боюнча SUPER.KG порталына пикирин билдирди. Анын айтымында, ал шектүүлөрдүн жазасыз калбоосу үчүн аягына чейин туруп, президентке да кайрылуу жолдойт.

"Эртең менен алардын өздөрүнүн милицияга келгендеги видеосун көрдүм. Өздөрү даярданып келген. Өздөрү "Жалбырак ТВны" алып барышкан болбосо таңкы саат беште "Жалбырак ТВ" кайдан угат? Эмнеге милиция маңдайында турган кылмышкердин колуна кишен салбайт? Логикалык жактан ойлонгон кишиге түшүнүктүү эле да. Агасы милиция болуп жүргөндөн кийин байланышы бар да алар менен. Өздөрүнүн айылында деле Бапышовдордун фамилиясын укканда элдин баары качышат экен.

Кармалбай эркиндикте жүрүшсө мени, баламды же күйөөмдү сабап өлтүрүп кетсе ага ким жооп берет? Алардын жазасыз калганынан. Жеке мен жабырлануучунун эжеси катары аягына чейин турам. Дагы бир жабырлануучунун туугандары деле аягына чейин турушса керек. Кечээ жабыркагандардын айылынан бери кишилер келип, кылмышкерлер табылсын деп жатышса, биз шектүүлөр менен кантип өз ара сүйлөшмөк элек. Мен азыр президентке да кайрылуу жазам, шектүүлөрдүн милицияга бүгүнкү келгенин кошуп жазайын деп жатам", - деди жабыркагандардын биринин эжеси Э.Б.

Бишкектеги Жал кичи районундагы үрөй учурган мушташта жабырлануучуларды сабагандар кармалганын Бишкек шаардык ички иштер башкы башкармалыгынын басма сөз кызматынан билдирген.