Жалил Атамбаевге "Ош окуясында үйү жабыркаган" деп берилген батирлер мэрияга кайтарылат

Жеке ишкер Жалил Атамбаевге берилген батирлер кайра Ош шаарынын мэриясына кайтарыла турган болду. Бул тууралуу Ош шаардык мэриясынын маалымат катчысы Азамат Абсатаров SUPER.KG порталына билдирди.

“Буга чейин маалым болгондой, массалык маалымат каражаттарында ишкер Жалил Атамбаевге июнь окуясында анын дагы үйү күйүп кетиптир деген негизде 4 батир берилгени боюнча бир топ нааразы пикирлер айтылган. Бул боюнча соттошуу болуп, Жогорку Соттун чечими менен үйлөр мэрияга өткөрүлө турган болду. Бирок батир кайтарылганы менен ал жерде адамдар жашап жатканына байланыштуу аларды үйдөн чыгарып, башка жакка көчүрүү маселеси калды. Маселени сот аткаруучулары чечип, адамдарды көчүрсө, үй бошойт. Батирлер кайтарылгандан кийин алар кимге берилерин түзүлгөн комиссиялык курам чечет”, - деди Абсатаров.

Эске салсак, жеке ишкер, Ош эл аралык аэропортунун милиция кызматынын мурдагы башчысы Жалил Атамбаевге батирлер 2011-жылы берилген.