Үрөй учурган мушташ. УКМК эки милиция кызматкерин камакка алды

Бишкек шаарынын Жал кичи районундагы үрөй учурган мушташта кылмышка катышкан адамдардын изин жашырган милициянын эки кызматкерин УКМК камакка алды. Бул тууралуу УКМКнын басма сөз кызматы билдирет.

"Бул окуядан кийин Чүй облусунун ШИИББи КМК уюшулган кылмыштуулукка каршы күрөшүү бөлүмүнүн кызматкери К.Бапышов кылмышты өз убагында аныктоого тоскоолдук кылуу максатында жана Бишкек шаардык ШИИББинин милициянын күзөттөгү кайгуул кызматынын экипажы К.Бапышов менен биргеликте сүйлөшүп алып, аталган кылмышка катышкан адамдардын изин жашырган. Бул факты Ленин райондук прокуратурасы тарабынан Кылмыштардын жана жоруктардын бирдиктүү реестрине катталып, тергөө иштери УКМКнын башкы башкармалыгынын тергөө башкармалыгына өткөрүлүп берилген.

2019-жылдын 6-сентябрында айтылган кылмыштарга шектүү катары Бишкек шаардык ШИИББинин милициянын күзөттөгү кайгуул кызматынын экипажы Э.С. жана М.К. кармалышты. Кармалгандар убактылуу кармоочу жайына киргизилишти. Тергөө иштери жүрүп жатат", - деп жазылат маалыматта.