Жалдагы үрөй учурган мушташ боюнча кармалган эки милиция кызматкери үй камагына чыгарылды

Бишкек шаарынын Жал кичи районундагы үрөй учурган мушташ боюнча камакка алынган патрулдук көзөмөл кызматынын айдоочусу жана автоматчик кызматында иштеген кызматкер Биринчи Май райондук сотунун чечими менен 2-ноябрга чейин үй камагына чыгарылды. Бул тууралуу соттун басма сөз кызматынан билдирди.

Ал эми эки кызматкердин жактоочусу Жыргалбек Бабаев бил иште айдоочу менен автоматчик өз кызматтарын гана аткарганын айтат.

"Бири айдоочу, ал унаа айдайт. Экинчиси автоматчик эгер кармап келе жаткан адам качып кетсе, аны атат. Бирок алар эч кимди жолдо качырып жиберген жок да. Алар окуя болгон жерге барышкан. Шектүүлөр жана алардын Чүй ОИИББинде иштеген байкеси болуп бирге 2-шаардык милиция бөлүмүнө келишкен. Алар шектүүлөрдү нөөмөт бөлүмгө өткөрүп беришкен дагы андан ары өз жумуштары менен кетишкен. Анан эмнеге эми алар күнөөлүү болуп калды? Бул жерде тергөөчү, башчы, нөөмөт бөлүмүнүн кызматкерлери ким качырып же кетирип жибергени суралышы керек эле. Себеби шектүүлөр бөлүмгө киргенден кийинки жумуш алардыкы да", - деди ал.