Окурман: "Оштон Москвага уча турган каттам алты жарым сааттан бери кармалууда". Аэропорттун жообу

Бүгүн, 9-сентябрда "Ош" эл аралык аэропортунан эртең менен саат 09:00дө Москвага учат деген каттам дагы деле кармалууда" деп окурман SUPER.KG порталына кайрылган.

"Эртең менен саат 9:00дө Москвага уча турган каттам алты жарым сааттан бери уча элек. Жүргүнчүлөр күтүү залына киргизилген бойдон отурушат, алардын курсагы ачып, нааразычылыгын айтышууда", - деген окурман.

"Манас" эл аралык аэропортунун маалымат кызматы бул учак "Урал эйрлайнс" авиакомпаниясына таандык экенин жана учак белгиленген убактан кеч келип конгонун билдирди.

"Урал эйрлайнс" авиакомпаниясынын учагы саат 12:30да гана келип конгон. Жүргүнчүлөрдү каттоо эми гана аяктап калды. Эмне себептен белгиленген убакта келбегенин компаниянын өзүнөн такташ керек", - деди аэропорттун маалымат кызматынан.