"Кечир мени, Самара!". Дима Билан Самара шаарынын тургундарынан кечирим сурады

Кечээ, 9-сентябрда Орусиянын Самара шаарында уюштурулган концерт учурунда орусиялык ырчы Дима Билан сахнадагы кылык-жоругу менен күйөрмандарын ирээнжиткен.

Анын күйөрмандары социалдык тармактарга аткаруучунун абалын чагылдырган видеолорду жүктөп, сынга алышкан. Билан сахнада чуркап, кол кезеп, микрофон кармаганы менен ырдоону унутуп, башка жакка алаксый берген.

Жергиликтүү жашоочулар бийликтен калаа күнүндө Дима Биланды концертке чакырганы үчүн коомчулук алдында кечирим суроону талап кылышкан.

Андан көп өтпөй ырчы жеке баракчасына "Кечир мени, Самара!" деп жазып, элден кечирим сураганын чагылдырган видеону жайгаштырды. Ал банги затын колдонбогонун, коньякты чегинен ашыкча ичип алганын айтып, Самара шаарындагы күйөрмандарына акысыз концерт коюуну убадалады.