Үрөй учурган мушташ: Адвокат шектүүлөрдүн милицияда иштеген агасынын кармалышын мыйзамсыз деп эсептейт

Бишкектин Жал кичи районунда үрөй учурган мушташтан 2 жигит жабыркап, комага түшкөн болчу. Аларды сабаганга шектүүлөр 2 айга камакка алынды. Ал эми мушташтан кийин окуя болгон жерге барган милиция кызматкерлери кылмышты жаап-жашырууга аракет кылган деген жүйөө менен иштен алынып, кылмыш иши козголгон. Ички иштер министрлиги балдарды сабаганга шектүүлөр менен милиция кызматкерлеринин бири Казыбек Бапышов бир тууган ага-инилер экенин маалымдаган.

Бүгүн, 12-сентябрда Бапышовдордун жактоочусу Динара Медетова маалымат жыйын өткөрдү.

"Мен Казыбек Бапышовдун кармалуусун мыйзамсыз деп эсептеп жогорку күч органдарына кайрылып кетүү үчүн маалымат жыйын берейин деп чечтим. Казыбек Бапышов Чүй ОИИБиндеги кызматынан мыйзамсыз алынды. Мен анын кармалуусун мыйзамсыз деп эсептейм. Мыйзамда жаран ата-энеси же бир тууганы жасаган кылмыш үчүн жооп бербейт деп жазылган", - деди ал.

Казыбек Бапышов 10-сентябрда кармалып, УКМКнын тергөө камак жайынын убактылуу кармоочу жайына киргизилген.