Улуттук көчмөндөр оюндары өтө турган Талас облусунда көчмө жыйын өттү

Вице-премьер-министр Алтынай Өмүрбекова 2019-жылдын 16-21-сентябрь күндөрү Талас облусунда өтө турган Улуттук көчмөндөр оюндарына карата даярдык боюнча көчмө жыйын өткөрдү. Бул тууралуу өкмөттүн басма сөз кызматынан билдиришти.

Маалыматка ылайык, Алтынай Өмүрбекова "Манас Ордо" улуттук комплексинин аймагын жана мелдештер өтө турган Талас шаарындагы ат майданды көрүп чыкты.

Өкмөттүн Талас облусундагы ыйгарым укуктуу өкүлү Марат Мураталиев вице-премьер-министрге жүргүзүлгөн даярдык иштери тууралуу маалымат берди.

Ал оюндун маданий бөлүгү – этно шаарча, этно базар жана башкалар "Манас Ордо" комплексинин аймагында, ал эми спорттук ат оюндары Р.Алканов атындагы ат майданда, күрөштүн түрлөрү боюнча "Газпром" дене тарбия жана ден соолукту чыңдоо комплексинде өтөөрүн маалымдады. Учурда акыркы даярдык иштери жүрүүдө.

Алтынай Өмүрбекова бардык даярдык иштерин мөөнөтүндө бүтүрүүнү тапшырды.

"Көчмөндөр оюнунун салтанаттуу бөлүгү президенттин, Жогорку Кеңештин депутаттарынын, премьер-министрдин, өкмөт мүчөлөрүнүн, дипломатиялык корпустун жана эл аралык уюмдардын өкүлдөрүнүн катышуусунда "Манас Ордо" комплексинде өтөт. Ар бир облус маданий программа жана театрлаштырылган оюн-зоок көрсөтөт. Ошондой эле Талас облусуна чет элдик коноктор, туристтер, өлкөнүн бардык аймактарынан мекендештерибиз келет. Оюнга 10 миңден 20 миңге чейин адам келээри болжолдонууда. Бардыгы жогорку деңгээлде өтүшү керек", - деди Алтынай Өмүрбекова.

Вице-премьер-министр көчмөндөр оюндары Кыргыз мамлекетинин брендине айланды, муну туризмди өнүктүрүү үчүн натыйжалуу колдонуу керектигин белгиледи.

Улуттук көчмөндөр оюндары Талас облусунда 16-21-сентябрь күндөрү өтөт. Он улуттук оюн боюнча мелдештер болот.