"Таластагы ат майдан Улуттук көчмөндөр оюндарына даяр эмес". Курулушка жооптуу департаменттин башчысы маалымат берүүдөн качууда

Таласта өтө турган Улуттук көчмөндөр оюндарына ат майдан даяр эмес. Бул тууралуу Facebook баракчасына Касым Рахманкулов аттуу колдонуучу жазып чыкты.

"Эртең, 16-сентябрда октябрда эмес, сентябрда көчмөндөр оюндары башталат. Чыныгы көчмөнгө "көлүк көчөөрдө керек!" Ат майданга келип мындай көрүнүшкө туш болдум. Жаан учурунда отургучтарды сырдап жатышат, темир түндүктөрдү тосмолорго илише элек, атайын коноктор отурган жерде кыштарды коюп бүтүшө элек, жумушчулар үч суткадан бери уктабай иштеп жатышат. Аягында "бул бизге керекпи деген суроо жаралды",- деп жазган колдонуучу.

Бул боюнча өкмөттүн Архитектура, курулуш жана турак жай коммуналдык чарба мамлекеттик агенттигинин маалымат кызматынан бул курулушка жооптуу агенттиктин курулуш жана турак жай департаментинин башчысы Адилет Абдыкадыров эч кандай маалымат бербей жаткандыгын билдирди. SUPER.KG порталы да Абдыкадыровго байланыша алган жок.

Улуттук көчмөндөр оюндары Талас облусунда 16-сентябрдан 21-сентябрга чейин өткөрүү пландалган. Мелдештер улуттук оюндардын 10 түрү боюнча өткөрүлөт.