Лейлек районунун акими: "Кыргыз-Тажик чек арасындагы куруу иштери коргондун ичинде жүрүп жаткандыктан толук токтоду деп айтууга болбойт"

Кыргыз-Тажик чек арасындагы курулуш иштери кечээ, 15-сентябрда болгон эмес. Бул тууралуу Лейлек районунун акими Баймурат Бекмуратов SUPER.KG порталына билдирди.

Акимдин айтымында, чек арада күч органдары коопсуздукту сактоо үчүн кызмат кылып жатышат. Бирок Кыргыз-Тажик чек арасындагы объекттин курулуш иштерин толук токтоду деп айтууга болбойт.

"Кечээ, 15-сентябрда толугу менен аталган аймакта куруу иштери болгон жок. Анткени мен ал жактан түндө келдим. Бирок куруу иштери коргондун ичинде жүрүп жаткандыктан, аны толук токтотулду деп айтууга болбойт. Биз аталган аймакка кагылышуу болуп кетүү ыктымалдуулугунун алдын алып, эч бир адамдарды жибербей турабыз. Тажик тарап такталбаган жерге буга чейин куруу иштерин башташкан. Ал жерде күч органдарынын, милициянын кызматкерлери жүрүшөт. Күч органдарынын адистери жүргөндүктөн, аскердик багыттагы жумуштар болуп жатат", - деди аким.

Баймурат Бекмуратов аталган аймакка жол тартканын, дагы кошумча маалымат бериле турганын кошумчалады.

Буга чейин Кыргыз-Тажик чек арасында тажик тарап такталбаган жерге курулуш ишин баштаганы тууралуу маалымдалган.

Андан көп өтпөй Лейлектен келген айылдык кеңештин депутаттары SUPER.KG порталы аркылуу бийликке кайрылуу жасаган.

Ал эми кечээ, 15-сентябрда мамлекетик чек ара кызматынан аталган аймактагы абал боюнча маалымат тараткан.