Таластагы Улуттук көчмөндөр оюндарында милиция кызматкерлери күчөтүлгөн тартипте иштейт

Талас облусунун аймагында Улуттук көчмөндөр оюндарын өткөрүүдө милиция кызматкерлери коомдук тартипти жана коопсуздукту камсыздайт. Бул тууралуу ИИМдин басма сөз кызматынан билдиришти.

Маалыматка ылайык, 16-21-сентябрда Улуттук көчмөндөр оюндарынын салтанаттуу ачылыш жана жабылыш аземине коомдук тартипти жана коопсуздукту 800гө чукул милиция кызматкери камсыздайт.

Негизги иш-чаралар "Манас" комплексинде, Талас шаардык ат майданында, "Газпром" ден соолукту чыңдоо комплексинде жана спорт-интернатында өткөрүлөт. Катышуучулар жана уюштуруучулар жайгашкан бардык конок үйлөрү жана мейманканалар ички иштер органдары тарабынан кайтарууга алынат.

Улуттук көчмөндөр оюндарын өткөрүүдө коомдук тартипти жана коопсуздукту камсыздоодо Ички иштер министрлиги бардык тартылган күч каражаттарын жумшайт жана коомдук тартиптин бузулушуна жол бербейт. Ички иштер министрлиги тарабынан баардык тиешелүү чаралар көрүлүп, өздүк курам күчөтүлгөн тартипте кызмат өтөп, коомдук тартипти сактоо толугу менен Ички иштер министрлигинин көзөмөлүндө турат.