"Чек ара маселесин чечүүдө коңшулар менен Кыргыздын атынан тең ата болуп сүйлөшөйүн". Экс-депутат Турсунбай Бакир уулу президентке кайрылуу жолдоду

Жогорку Кеңештин экс-депутаты Турсунбай Бакир уулу бүгүн, 17-сентябрда Кыргыз-Тажик чек арасындагы окуя боюнча президент Сооронбай Жээнбековго кайрылуу жолдоду. Анда минтип жазылат:

"Кыргыз өлкөсүнүн Баткен облусундагы чек арабызда кайра-кайра болуп жаткан атышуулар, жаңжалдар боюнча «ЭрК» партиясынын атынан Кыргыз Жумуриятынын президенти Сооронбай Жээнбеков мырзага кайрылам.

Коопсуздук жана чек ара маселеси өлкөнүн түштүк аймагында курч болуп жатат. Жылуу жерде жатып алып, ордунан козголгусу келбей жаткандарга айта турган сөзүм: Баткен, Лейлек, Ош менен Жалал-Абад да жалпы мекенибиз. Аларсыз Кыргызстан деген мамлекет жок! 20 жыл мурда "Өзбекстандын ислам кыймылы" уюмунун моджахеддери Кыргыз өлкөсүнүн түштүк аймагына кол салганда «сакалчандар келип жатат!» деп алыскы Нарын менен Таластын да тургундарынын жүрөгү түшкөн. Ал эми бүгүн болсо, Лейлекте атышуу болуп жатат деп мамлекеттин ал аймагына кайдыгер кароо, кош көңүлдө болуу - кечирилгис чыккынчылык!

1999-жылы мамлекетибиздин биримдиги, бүтүндүгү, элибиздин коопсуздугу, тынч жашоосу үчүн деп өлкөбүздүн эң артта калган аймагын Баткен облусу деп түзүшкөн.

Бүгүн ар бири өз колотун эмес, жалпы мекенин ойлонуусу абзел! Бара-бара түштүк аймагын алдырып жиберсек, өлкөбүздү алдырып жибергенге барабар болуп калат. Мамлекетибиздин түндүк аймагында көп эле жерлерибизди коңшу өлкөлөргө алдырып жибергенбиз. Эми жер таратуу жарманкени жаппайлыбы?! Анан мамлекети жок элдер сыяктуу бечара болуп жүрүүдөн Аллахым өзү элибизди сактасын!

Урматтуу ажо, туптуура 20 жыл мурда ажобуздун берген ыйгарым укуктарынын негизинде Ооганстан менен Тажикстанга чейин барып сүйлөшүүлөрдүн негизинде Баткен согушунун токтотулушуна, "Өзбекстандын ислам кыймылынын" моджахеддеринин Кыргыз жергесинен чыгып кетүүсүнө, туткундагы генералыбыз баш болгон жоокерлерибиздин жана Япониянын жарандарынын аман-эсен бошоп келүүсүнө Аллахымдын буйругу менен себепкер болгонмун.

Азыр деле ошондой ыйгарым укуктарды сизден сураймын, урматтуу Шарип уулу Сооронбай! Кыргыз өлкөсүнүн атынан коңшулар менен чек ара маселесин жана чек арада жашап жаткан элдин тынч жашоосун чечүүдө тең ата болуп сүйлөшөйүн. Мекенди сүйүү ыймандан. Аллахымдын буйругу жана сиздин чечимиңиз менен мекенчилдигимди иш жүзүндө далилдөөгө даярдыгымды билдиремин".

«ЭрК» партиясынын лидери, Кыргыз мамлекетинин атайын жана толук ыйгарымдуу элчиси, Мамлекеттик кызматтын 1-класстагы мамлекеттик кеңешчи Турсунбай Бакир уулу.