"Шоколад толтурулган ваннада эс алды" деп сынга алынган орусиялык аткаминер кызматтан алынышы мүмкүн

Орусиянын Ульяновск облусунун губернаторунун кеңешчиси Светлана Опенышева эмгек өргүүсүндө жүрүп, сүрөт жүктөгөндөн кийин кызматтан алына турган болду. Бул тууралуу орусиялык маалымат булактары жазышууда.

Ага ылайык, Светлана Опенышева эмгек өргүүсүн Азербайжандагы Баку шаарында өткөрүп, шоколад толтурулган ваннада жаткан сүрөтүн баракчасына илген. Бул сүрөттү көргөн Ульяновск облусунун губернатору аткаминер аялдын бул аракетин чектен ашкан мактаныч деп сыпаттаган.

Массалык маалымат каражаттары Опенышева Нафталан шаарында да болгонун, ал жерде мунай менен дарылоо процедуралары жүргүзүлөрүн жазып чыгышкан. Ага карабастан, аткаминер айымдын сүрөтүнө көптөгөн терс пикирлер жазылган. Буга Опынешванын жүктөгөн сүрөтүнүн алдына "Шоколад көптүк кылбайт" деп жазган билдирүүсү себеп болгон.

Көптөгөн терс пикирлерди окуган губернатор анын баскан-турганын жар салуусу туура эмес деген пикирин билдирип, кызматтык иликтөө жүргүзүлө турганын жана жумуштан кетире турганын айткан. Ошол эле учурда массалык маалымат каражаттары Опенышева шоколад толтурулган ваннада эмес, нафталан (дары катары пайдаланылчу нефть) менен дарылык процедурадан өтүп жаткан сүрөтүн жүктөгөнүн жазышты. Мындан тышкары, анын эс алуусуна көп сумма кетпегенин, күйөөсү экөөнүн Бакуга барып келүүсүнө 77 миң рубль чыгымдалганын белгилешкен. Опенышеванын айлыгы 100 миң рублдын тегерегинде экендиги жазылат маалыматта.

Аткаминер аял коомчулукка кайрылып: "бул сүрөтүм менен кимдир бирөөнү капа кылсам кечирим сурайм. Мен болгону Азербайжандагы эс алуунун кымбат эместигине кубанып, жаман оюм жок эле сүрөт жүктөгөм. Ушундай болуп калды", - деп жазган. Ал сүрөтүн баракчасынан өчүрүп салган.