Дүйнө чемпиону Айсулуу Тыныбекова: "Бул биздин жалпы жеңиш!"

Айсулуу Тыныбекова бүгүн, Нур-Султан шаарында өтүп жаткан кыз келиндер күрөшү боюнча Дүйнө чемпиондугунда алтын медаль тагынды. Ал жеңиштен кийинки сезимдери менен бөлүштү.

- Бул алтын медалды мекениме арнайм. Алтын медалды жеңүүгө он жылдык эмгек сарпталды. Бүгүнкү финалды аябай күткөм, анткени Юсейнге 2013-жылы утулуп калгам. Финалга жетүү үчүн беттештер оңойго турган жок. Мен болгон күчүмдү жумшадым. Бул бир гана менин алтын медалым эмес, бардык команданыкы.

- Финалды жеңүү канчалык оор болду?

- Эң башкысы өзүңө болгон ишеним керек. Биз 10 жыл даярдандык. Мен билгем, чемпион болорумду. Бул жол татаал болорун да билгем. Машыгууларда болгон күчүмдү жумшап, өлгөнгө чейин даяр болуп калат элем. Эми башкы максат - Олимпиада оюндары.

- Жеңишиңди кимге арнайсың?

- Жеңишимди бардыгына арнайм. Менин командама, машыктыруучуларыма, дарыгерлерибизге, күйөрмандарга, туугандарыма жана албетте, мекениме! Бул биздин жалпы жеңиш!