Көк бөрү боюнча Чүй облусунун командасы Ош облусун 14:1 эсеби менен утуп, Улуттук көчмөндөр оюндарынын чемпиону аталды

Таласта өтүп жаткан Улуттук көчмөндөр оюндарынын алкагында көк бөрү боюнча финалда Чүй облусунун командасы Ош облусун 14:1 эсеби менен утуп, чемпион аталды. Бул тууралуу жаштар иштери, дене-тарбия жана спорт агенттигинен билдиришти.

"Көк бөрү оюну боюнча мелдешке өлкөнүн 7 облусунан жана Бишкек, Ош шаарларынан командалар катышкан. Экинчи орунду Ош облусунун командасы ээлесе, үчүнчүнү Талас, төртүнчү орунду Бишкек шаары ээледи. Чүй облусунун командасы биринчи орунду камсыздап, Улуттук көчмөндөр оюндарынын көк бөрү боюнча чемпиону аталды", - деди агенттиктин маалымат кызматы.

Көк бөрү оюнунун байге фонду 800 миң сомду түзүп, 1-орунду алган Чүй облусунун командасына 300 миң сом, Ош облусу 200 миң сом, Талас облусу 100 миң сом, Бишкек шаарынын командасына 50 миң сом, ал эми 5-9-орун алган командаларга 30 миң сомдон берилерин маалымат кызматы кошумчалады.

Таластагы Улуттук көчмөндөр оюндары 16-сентябрь күнү башталып, бүгүн, 21-сентябрда жыйынтыкталат.