Талас облусунда сел жүрүп, жолдорду, айдоо аянттарын суу каптады

Талас облусунда катуу жааган жамгырдын кесепетинен сел жүрүп, жолдорду суу жеп, айдоо аянттарын суу каптаганын ӨКМнын басма сөз кызматы билдирди. Маалыматка ылайык, 8-августта Бакай-Ата районунун Ынтымак айылында 20 гектар көп жылдык чөп жана 10 гектар төө буурчак себилген жерди сел суусу каптаган. Ошондой эле Көк-Таш айылында “Кызыл-Жар” каналындагы суунун деңгээли көтөрүлүп, 18 гектар көп жылдык чөп жана 12 гектар төө буурчак себилген жерди суу каптаган. Каналды тазалоо иштерине “Үрмарал” биримдик федерациясынан 1 экскаватор, райондук Суу чарба башкармалыгынан 1 экскаватор жана айыл аймагынан 97 адам тартылып, 10-августта жумуш толук аяктаган. Мындан сырткары селдин кесепетинен Кара-Коюн ички чарбалык жолунун 8 чакырым аралыгын беш жеринен суу жеп кетип, жол каттамына кыйынчылык жаралган. Турак үйлөргө коркунуч келтирилген эмес. Учурда Бакай-Ата райондук Жарандык коргоо комиссиясы иш алып барууда.