Чек арада каза болгон Равшан Муминовдун үй-бүлөсүнө жергиликтүү эл акчалай жардам берди (видео)

16-сентябрда Баткендин Максат айылына жакын жердеги Кыргыз-Тажик чек арачыларынын ортосунда атышуу болгон. Атышуунун кесепетинен мамлекеттик чек ара кызматынын “Бөрү" атайын тобунун кызматкери, прапорщик Равшан Муминов каза болуп, 13 адам жаракат алган. Ал эми Тажикстан Кыргыз-Тажик чек арасындагы атышуудан үч чек арачысы каза болгонун кабарлаган.

Бүгүн, 26-сентябрда маркум чек арачы Равшан Муминовдун үйүндө куран окулду. Бул тууралуу SUPER.KG порталына Лейлек районундагы активист Уланбек Матмуратов билдирди. Белгилүү болгондой, Кулунду айыл өкмөтүнүн жашоочуларынын атынан маркумдун үй-бүлөсүнө 100 миң сом берилди.

"Бүгүн, 26-сентябрда каза болгон мекендешибиздин жакындарына көңүл айтылып, куран түшүрүлүп, элден чогулган акча жакындарына тапшырылды", - деди Матмуратов.

Буга чейин маркум чек арачы Равшан Муминовдун үй бүлөсү батирде жашап келгени тууралуу жазганбыз.