Орусияга иштегени келип, дайынсыз жоголду делген Кыргыз жараны асынып алган. Маркумдун сөөгүн мекенге алып келүү аракети жүрүүдө

2 жыл мурун Москва шаарына иштегени келген Кыргыз жараны асынып алган. 2018-жылдын июнь айында маркумду эч ким издөөгө албагандыктан, мамлекеттин эсебинен жерге берилген. Маалыматты ИИМдин басма сөз кызматынан билдиришти.

Маалыматка ылайык, ушул жылдын июнь айынын башында ИИМдин Орусиядагы өкүлчүлүгүнө Ысык-Көл облусунун 50 жаштагы тургуну кайрылып, тууганы дайынсыз жоголгонун айтып, табышууга жардам сурап кайрылган. Кайрылууда анын 21 жаштагы О.Б. аттуу тууганы көп убакыттан бери белгисиз себептер боюнча жакындары менен байланышпай калган.

"Ал акыркы жолу байланышка 2018-жылдын апрель айынын башында чыккан. Сурамжылоонун жүрүшүндө дайынсыз болгон жаран О.Б. туугандары менен кошо 2017-жылы Москва шаарына иштегени келген. Аны акыркы жолу "Шелковская" метросунун аймагынан көрүшкөн. Туугандары тарабынан көрүлгөн өз алдынча издөө чаралары эч кандай жыйынтык берген эмес. Бирдиктүү ыкчам-издөө иш-чараларынын жүрүшүндө, 2018-жылдын 12-апрелинде Москва шаарынын Измайловск сейил багында кебетеси азиялык болгон эркек кишинин жансыз денеси табылган. Ал асынып алган жана денесинде зомбулуктун белгилери болгон эмес. Бул факты боюнча тиешелүү соттук-медициналык экспертиза жүргүзүү үчүн өлүкканага жөнөтүлгөн. 2018-жылдын июнь айынын ортосунда эч ким издөөгө албагандыктан, мамлекеттин эсебинен жерге берилген. Издөө иштеринде белгисиз адамдын аты-жөнү такталып, ал туугандары дайынсыз жоголду деп эсептешкен 21 жаштагы О.Б. аттуу жаран болуп чыкан. Азыркы учурда тиешелүү процессуалдык аракеттерди жүргүзүү менен окуя боюнча туугандары маалым болуп, эксгумациялоо жана "Жүк-200дү" мекенине жөнөтүү үчүн туугандары тарабынан зарыл болгон документтерди даярдоо жөнүндө маселелер чечилип жатат", - деп билдиришти басма сөз кызматынан.