Операция учурунда таш бараңга кабылган УКМКнын кызматкерлери боюнча окуянын чоо-жайы

Бүгүн, 28-сентябрга караган түнү Кыргыз-Казак чек арасында операция жүргүзүп жаткан УКМКнын кызматкерлерине белгисиз адамдар тарабынан кол салуу болгон.

УКМК тараткан маалыматка ылайык, аталган ведомство тарабынан жүргүзүлгөн мыйзамсыз чек араны кесип өтүүнү алдын алуу жана бөгөт коюу боюнча тергөө иштерине тоскоолдук кылуу фактысы катталды. “Чалдыбар автожолу” текшерүү-өткөрмө пунктунан белгисиз адамдар УКМКнын тергөө иштерине тоскоолдук жаратып, кызматкерлерди таш бараңга алышкан. Чүй облусунун Панфилов РИИБи тарабынан материалдар кылмыштардын жана жоруктардын бирдиктүү реестрине катталды. Азыркы учурда Ички иштер министрлиги менен бул фактыга катыштыгы бар адамдар такталууда, жыйынтыгында тергөө аракеттерине тоскоолдук кылган адамдарга юридикалык баа берилмекчи", - деп жазылат маалыматта.

Укук коргоо органдарындагы өздүк булак берген маалыматка ылайык, УКМКга Чек ара кызматындагы адам опузалап пара алганы жатат деген маалымат түшкөн. УКМК ыкчам кармоо операциясы менен барган учурда ал адам чек арадан мыйзамсыз өтүп кетүүгө аракет кылган. Колго түшүрүү планы жүрүп, кармалган адамды кичи автобус менен алып кетип жатканда, белгисиз адамдардар таш менен кичи автобустун айнектерин сындырышкан. Таштар айрым кызматкерлердин башына, колуна тийген, алган жаракаттары жеңил деп айтылууда.

Ал эми Чек ара мамлекеттик кызматы бул окуя боюнча эч кандай маалымат бере элек.