Депутат: "Уран казууга тыюу салган мыйзамга өкмөт тымызын бут тосуп жатат"

"Уран казууга тыюу салган мыйзамга өкмөт тымызын бут тосуп жатат" деп бүгүн, 2-октябрда Жогорку Кеңештин жыйынында депутат Алмамбет Шыкмаматов билдирди.

"Биз февраль айында Жогорку Кеңештин бир топ депутаттары Кыргыз өлкөсүнүн аймагында уран казууну токтотуу боюнча элдин талабы менен мыйзам иштеп чыкканбыз. Аны депутаттар колдоп, июнда кабыл алганбыз. Премьер-министр, биринчи вице-премьер-министр келип, урандын казылышына каршыбыз деп айтышкан. 4 ай өттү. Бул мыйзамды Отун-энергетикалык комплекси жана жер казынасын пайдалануу боюнча комитетине өкмөт киргизбей, күн тартибинен экинчи жолу алдыртып коюшту. 5 айдан бери корутунду бербей жатышат. Уран менен торий казылсын деп ачык позицияңарды айтпайсыңарбы. Трибунадан биз макулбуз деп айтып, эми тымызын акырын мыйзамга бут тосуп жатат. Биздин мактана турганыбыз экология, кооз жаратылыш, таза продукция деп айтып жүрөбүз. Уран менен торий ошолорго душман. Урандан түшкөн акча элдин ден соолугунан да маанилүүбү?", - дейт Шыкмаматов.