Депутат Карамушкина профсоюз тууралуу мыйзам долбоору боюнча парламенттик угуу өтпөгөнүн айтты

Бүгүн, 2-октябрда Жогорку Кеӊештин жыйынында депутат Ирина Карамушкина профсоюз тууралуу мыйзам долбоору боюнча парламенттик угуу өтпөгөнүн айтты.

"Мындай мыйзам долбоору боюнча парламенттик угуу эмнеге өткөн жок. Көпчүлүктүн сунуштары эске алынган жок. Тийиштүү комитет профсоюздардын пикирине көңүл бурбай жатат. Парламенттик угууну өткөрүүнү талап кылам. Комитетке кайрадан жөнөтүү керек", - дейт Карамушкина.

Мыйзам долбоорунун демилгечилеринин бири Алмазбек Токторов парламенттик угуу өткөнүн билдирди. Токторовдун айтымында, профсоюздун өкүлдөрү өздөрү парламенттик угууга катышуудан баш тартышкан.

Профсоюздар федерациясынын жетекчисинин орун басары Рысгүл Бабаева билдиргендей, парламенттик угууга 2 депутат катышкан. “Алмазбек Токторов менен Гүлшат Асылбаева гана парламенттик угууга катышкан. Биз өзүбүздүн сунуштарыбызды бергенбиз”, - деди Бабаева.