Кыргыз өлкөсүндө жасалган робот президентти жана келген конокторду тосуп алды (видео)

Бүгүн, 4-октябрда Бишкек шаарында “Борбор Азиядагы санариптик трансформация” аталышында өткөн ири конференцияда Санжар Жумабеков иштеп чыккан робот келген коноктор менен учурашып, аларды тосуп алды.

Аталган иш-чарада көпчүлүктүн көңүл борбору аталган роботко бурулду. Ал башына ак калпак кийип, колун булгалап, келген конокторду өзүнө тартып турду.

Роботту иштеп чыккандардын сап башында турган Санжар Жумабеков бүгүн анын эмгегинин негизги кызматы президент Сооронбай Жээнбеков менен учурашуу болгонун айтып, SUPER.KG порталына маек берди.

“Роботтун аты РобоСкай. Өзүм РобоСкай робот иштеп чыгуу долбоорунун жетекчиси болуп иштейм. Роботтун программасын өзүбүз жазабыз жана ар бир тетиктери Кыргыз өлкөсүндө жасалган. Эмгегибиз сатуу борборлорунда, ар кандай иш-чараларда көргөзмө катары коюлуп жатат. Бүгүн роботубуздун кызматы президент менен саламдашуу болуп, ал Сооронбай Жээнбеков менен учурашты", - деди Жумабеков.

Эми алар роботту адамдар менен сүйлөшүп, диалог түзө ала тургандай кылып иштеп чыгууну ниет кылып жатышат.

"Келечекте робот өз алдынча, өзү адамдарды таанып, аларды сүзүп албагандай тескерисинче жардам бере тургандай варианттары ойлонулуп жатат. Мисалы, банкоматтарды роботтун төш жагына орнотуп койсок болот. Ага адамдар келип, карточкаларын сунуп, акчаларын ала алат. Бул тажрыйба азыркы тапта Орусия өлкөсүндө колдонулуп жатат. Банктарга роботторду банкомат катары коюп коюшкан. Роботтор официанттык кызматты дагы аткара алышат", - дейт ал.

Азырынча бул робот алардын тажрыйбасындагы биринчи эмгеги болуп эсептелинет. Аны жасоого жалпы үч кишинин көз майы, кол эмгеги талап кылынган. Ал эми экинчи варианттын алар учурда ойлонуп жатышат.

Бирок Жумабековдун айтымында, ойлонулган роботту жасоого азыркы тапта каражат жетпей турат.

"Экинчи варианты учурда ойлонулуп жатат. Бирок ага каражат жетпегенинен улам биз инвесторлор менен жолугуп, сүйлөшүүлөрдү жүргүзүүдөбүз. Роботторду ар кандай иш-чараларга, мисалы, туулган күндөргө, үлпөт тойлорго ижарага берип жатабыз. Негизинен роботтун баалары 300 миң сомдон 1 жарым миллилон сомго чейинки акча каражатын чапчыйт".

Бул маселеден сырткары, ал робот жасаган адистердин жетишсиздиги дагы маселе болуп жатканын кошумчалап өттү.

"Бул тармактагы адистерди табуу биздин өлкөдө чынында чоң маселе экен. Бул роботту жасоодо үч киши иштеди. Атам, мен жана дагы бир адам программа жагынан жардам көрсөттү".