Жактоочу: "Элдин демилгеси менен Садыр Жапаровду эркиндикке чыгаруу боюнча кол топтолууда"

Камактагы саясатчы Садыр Жапаровдун эркиндикке чыгышын талап кылгандар кол топтоп жатышат. Маалыматты SUPER.KG порталына экс-депутаттын жактоочусу Шарабидин Токтосунов ырастады.

Маалыматка ылайык, бул үчүн өлкөдөгү шаарларда жана аймактарда атайын штабдар түзүлүүдө. Ал жерге каалоочулар келип, Жапаровдун абактан чыгышы боюнча жазылган кагазга өзүнүн колун коюп кетсе болот. Мындай штабдар Кыргыз жарандары жүргөн башка өлкөлөрдө да иштейт.

"Мындай иш-аракеттер бир апта мурун башталган. Бул убакта 10 миңдей адамдын колу топтолду. Жалпы 100 миң кол топтойбуз деген план бар. Кол топтоону Садыр Жапаров камактан чыксын деген эл өзү демилгеледи. Көбү митинг өткөрөлү деп жатышкан, бирок митингдер эч кандай натыйжа бербей жаткандыктан, ушул ыкманы эл өзү сунуштады. Кол топтолуп бүткөндөн кийин биз президентке жана Жогорку Сотко арыз менен кайрылабыз", - деди Токтосунов.

Окуянын чоо-жайы:

Садыр Жапаров 2013-жылдын 7-октябрында Каракол шаарында "Кумтөр" боюнча нааразычылык акциясындагы баш аламандыкты уюштурууга күнөөлөнүп, 2017-жылдын 25-мартында Кыргыз-Казак чек арасынан кармалып, камакка алынган. 2017-жылдын 2-августунда Жапаров Биринчи Май райондук сотунун өкүмү менен "барымтага алуу" беренеси боюнча күнөөлүү деп табылып, 11 жыл 6 айга эркинен ажыратылган. Райондук соттун өкүмүн Бишкек шаардык соту жана Жогорку Сот күчүндө калтырган. Быйыл 30-апрелде Жогорку Сотто абактагы саясатчы Садыр Жапаровдун иши кайрадан каралып, соттук коллегия анын жаза мөөнөтүн бир жарым жылга кыскарткан.