Куудул Борончу Кудайбергенов тойдо ырдаган чиновниктер тууралуу: "Ар ким өзүнүн ордун тапты"

Куудул Борончу Кудайбергенов саясатчылар тойлордо ырдай баштады, ар ким өзүнүн ордун тапты деген видеосу менен бөлүштү. Анын айтымында, артисттер менен саясатчылар бири-бири менен орун алмаша турган учуру келди.

Видеодо куудул буга чейин саясатчыларды артист десе ишенбей койгон досуна кайрылып, "чиновниктер кайсы тойго барбасын ырдап чыгышууда, менин айтканыма эми ишендиңби?" деген.

Борончу Кудайбергенов Талант деген досуна атайын тартып жибергенин айтып буларга токтолду.

"Ал видеону досума эле жибергем. Социалдык тармакка тарап кетет деп ойлогон эмесмин. Өзүм тамада болгондуктан тойлордон чиновниктердин ырдап жүргөнүнө көп жолу күбө болгом. Бирок алар көмүскөдө эле калып калчу. Ушул жылдын күз мезгилинен бери саясатчылар ырчылар менен чогуу же жеке ырдап жаткан видеолору тарай баштады. Жакында эле Жогорку Кеңештин депутаты Руслан Казакбаевдин уулунун үйлөнүү үлпөт тоюнда, андан кийин аэропорттун кызматкерлеринин кечесинде дагы чиновниктер ырдап чыгышты. Модага айланып бара жаткандай", - дейт ал.

Жогорку Кеңештин депутаты Руслан Казакбаевдин уулунун үйлөнүү үлпөт тоюнда саясатчылар менен Кыргыз Республикасынын Эмгек сиңирген артисти Мирбек Атабековдун чогуу ырдаган видеосуна шилтеме.