Бишкекте айдоочу милиция кызматкерлеринин огунан жаракат алды

"Жол эрежесин бузуп, рулда телефон менен сүйлөшүп бара жаткан айдоочуга милиция кызматкерлери ок чыгарууга аргасыз болушкан" деп ИИМдин Жол кыймылы коопсуздугун камсыздоо башкы башкармалыгынан маалымат таратты.

Маалыматка ылайык, алгач милиция кызматкерлери айдоочуну токтотууга аракет жасашкан. Бирок алардын аракетинен майнап чыккан эмес. Окуя 12-октябрь күнү болжол менен саат 18:15 чамасында орун алган.

"Автоинспекторлор Лексус-470 үлгүсүндөгү унаанын айдоочусунун телефон менен сүйлөшүп бара жатканынан улам, аны унааны токтотуусун өтүнгөн. Бирок айдоочу бейкапар, эскертүүгө карабай жолун улаган. Мындан улам автоинспекторлор аталган үлгүдөгү унаанын артынан кууп жөнөшкөн. Милиция кызматкерлери качып бара жаткан айдоочуну ашып өтүүгө аракет кылганы менен ал буга жол берген эмес. Мындан улам инспекторлор тарабынан алгач асманды көздөй эскертүү огу атылган. Айдоочу эскертүүлөрдү эске албай милиция кызматкерлеринин куралын жулуп алууга аракет жасаган. Мындан улам айдоочуга карата ок атылып, ал ооруканага жеткирилген", - деп айтылат маалыматта.

Аталган окуя Кылмыштардын жана жоруктардын бирдиктүү реестрине каттоого алынып, унаа 1991-жылы туулган М.Х. аттуу жаранга таандык экени аныкталды. Учурда тергөө иштери жүрүүдө.

Аталган унаа Кыргыз өлкөсүнүн аймагында каттоодон өтпөгөнү белгилүү болду.