Чүй өрөөнүндө Борбор Азиядагы алгачкы панорама музейи курулат

Өлкөдө "Манас" эпосуна арналган панорама музейи курулат. Бул тууралуу долбоордун демилгечиси Темирлан Сарлыкбек уулу билдирди. Ага ылайык, понорама музейи үчүн Чүй облусунун Таш-Мойнок айыл өкмөтүнө караштуу аймактан жер алынган. Учурда курулуш иштери башталганы турат.

"Панорама музейи - бул тарыхый окуялардын, инсандардын таржымалын чагылдырган чоң көлөмдөгу сүрөттөрдүн галереясы десек болот. Панорама музейи дүйнөнүн көп мамлекеттеринде бар. Алсак, Ватерлоо шаарында Напалеондун акыркы согушу тууралуу панорама музейи курулган.Туркияда Мехмед Хан Стамбулга кантип кирип келгендигин баяндаган музей бар. Мындан тышкары, Бурса шаарында түрк элдеринин Орто Азияга көчүп баруу тарыхын чагылдырган панорама музейи иштейт. Бул долбоор ишке ашса Борбор Азиядагы алгачкы панорамалык музей болуп калат. “Манас” панорама музейи улуттук наркыбызды, баалуулугубузду дүйнөгө таанытуучу музей болот деп ишенем. Кыргыз эли коррупциянын, митинг-пикеттердин эмес, ушундай улуттук мурастардын өлкөсү болушун каалайм. Долбоордун алгачкы этабына кирген имараттар 2 жылдын ичинде курулуп бүтөт", - деди Темирлан Сарлыкбек уулу.